حوار عن الجنة !
يوليو 18th, 2010
نايف : دائماً يكرر في محاضراته .. الحور العين .. ويبدأ بالوصف الذي ربما يثير أكثر من أن يحفز للعمل !
فهد : والجنة .. فيها رمان .. دائماً يقولون رمان الجنة لا يحمل من رمان الدنيا إلا الاسم .. كلام فاضي !
محمد : كيف فاضي !؟
فهد : أنا أقول رمان الجنة مثل رمان الدنيا .. ولا ما ذكره الله تعالى لنا بالقرآن !
( سالم متابع بصمت ! )
محمد : اسمع .. رمان الجنة العلماء يقولون ما نعرف كنهه حتى نقول إنه مثل رمان الدنيا أو غيره .. لكن الاسم نفس الاسم والشكل والمضمون من علم الغيب الذي لا يعلمه إلا الله ..
فهد : لا .. رمان الجنة أنا أجزم إنه فيه حب .. ولا ما كان رمان !
نايف : مو شرط ..!
محمد : الجح ( الحبحب ) يزرع باليابان والمكسيك وعندنا .. وله عدة أشكال لكن كله جح .. فيه كبير وفيه صغير وفيه أحمر وفيه أبيض وفيه دائري .. لا وأزيدك من الشعر بيت فيه مربع !
فهد : برضو أقول إن الفاكهة اللي بالجنة مثل فاكهة الدنيا ..
محمد : الصحيح إنك تقول لا مثلها ولا هي مثلها .. لأنك إن قلت مثلها فأنت تدعي إنك تعرفها !
فهد : لكنك تعتبر معطل للصفة إن قلت بس تحمل الاسم !
محمد : الحين كل شيء مذكور بالقرآن .. تعرف شكله ؟ أو تعرف صفته ؟ أو تعرف كنهه ؟؟ فيه أشياء كثيرة سواء بالجنة أو في النار … يمكن ما نعرف عنها إلا الصفة أو الاسم .. لكن علمها عند الله ..
فهد : مثل ؟
محمد : الله يقول : " طلعها كأنه رؤوس الشياطين " .. بالله عليك أوصف لي رؤوس الشياطين !!؟
فهد : ….!
( سالم يبتسم )
نايف : فيه آية بالقرآن .. عجزت لا أتذكرها .. تقول إن الجنة ما تحمل من الدنيا إلا الأسماء !
محمد : ما أذكرها !
فهد : ولو .. الفاكهة واللبن والعسل .. نفس اللي بالدنيا .. ولا كيف يذكرها الله بالقرآن لنا ..
محمد : يا أخي .. مو كل شيء مذكور تعرفه .. مثلاً رؤوس الشياطين .. ما قال بتفسيرها إلا أحد الأعراب ! قال رؤوس الشياطين كانت تذكر عند العرب ليخوفوا بها .. لكن لا يعلم كنهها ولا شكلها !
فهد : يعني بتقولي إن اللبن مو أبيض مثلاً !؟
محمد : الله أعلم .. يا أخي هم ما قالوا يختلف ولا قالوا يشبه .. لأنهم لو قالوا يختلف مثل لو قالوا يشبه ! لأن النفي والإثبات يعني العلم بالشيء نفسه .. فلو قالوا عنب الجنة يختلف عن عنب الدنيا شكلاً أو مضموناَ .. لكانوا يعلمون بشكله ومضمونه .. لكن العلماء يقولون يحمل منه الاسم والباقي علمه عند ربي .. لكن جزماً أنه أفضل مما في الدنيا !
فهد : ما أقنعتن !
محمد : الله سبحانه وتعالى .. ذكر أن له يد وله ساق وله قدم وله عينان .. هل يعني أنها بنفس صفات المخلوقين ؟ تعالى الله عن ذلك .. نحن نثبت له الصفات لكن التشبيه ممنوع .. كما أن الإيمان به واجب والسؤال عن ذلك بدعة ..
نايف : ياخي باختصار .. العنب كان في السابق فيه بذر .. يعني لو كنت أنا من القدماء كنت مثلك أحلف وأقسم إن عنب الجنة فيه بذر ! لكن الحين مع العلم الحديث طلع العنب البناتي .. ما فيه بذر .. أنا أقدر الحين أسوي لك رمان معالج وراثياً.. لكن اللي بوسطه مو حب .. بوسطه فشار !! بتذوقه تقول هذا رمان .. ورهيب طعمه .. لكن ما هو رماننا اللي حنا نعرفه .. فهذا ما يعني إن كل شيء يحمل نفس المسمى يعني يحمل نفس الشكل والمضمون ..
فهد : تصدق .. أقنعتن !
كلنا : أخيراً 
ليلة البارحة .. بتصرف وإعادة ترتيب
محمد الصالح
نقاش رائع
وأكثر من رااائع ..